Skip to content

Planto de la semajno 12: kornlotuso

20.03.2010

En Finnlando ankoraŭ regas vintro kaj la tero estas kovrita de neĝo. Tial mi daŭrigas per fotoj faritaj en antaŭaj jaroj.

En esperanto nur malofte oni uzas la saman vorton por du aŭ pluraj malsimilaj aferoj. Tiel tamen estas ĉe la vorto lotuso. Aŭdante ĝin vi verŝajne pensas pri akva planto, kiu estas konata en pluraj aziaj kulturoj (Nelumbo nucifera, esperante hinda lotuso) aŭ nimfeoj (Nymphea), ankaŭ konataj kiel akvolilioj.  

Lotuso tamen estas ankaŭ la nomo de alia genro, kiu estas ordinara en Eŭropo kaj Azio. La plej ofta reprezentanto de tiu genro en la nordaj landoj estas korna lotuso, kornlotuso  (Lotus corniculatus, fi keltamaite, sv käringtand). Interesa detalo estas la sveda nomo käringtand. Ankaŭ en tre malnovaj finnaj tekstoj oni trovas “ämmän hambat”. Tiuj du signifas en esperanto proksimume ‘maljunulina dento’ aŭ ‘virinaĉaj dentoj’. De kie venas tiu stranga, el nuna vidpunkto malrespekta nomo? Rigardu atente la floron. Ĉu vi iam vidis bildojn pri virinoj de antaŭaj jarcentoj, kiuj perdis ĉiujn siajn dentojn?

Komentado estas fermita.

%d bloggers like this: